Компания

ТОП-20 IT-көшбасшылары – 2026

Салалық қауымдастық мұнай-газ саласының болашағын қалыптастырып отырған мамандарды айқындауды жалғастыруда. PetroCouncil дайындаған «Қазақстанның мұнай-газ саласындағы ТОП-20 IT-көшбасшылары – 2026» атты 5-ші жыл сайынғы шолу аясында технологиялар мен өндірістік процестер тоғысындағы кәсіби мамандар анықталды.

Рейтингке мемлекеттік құрылымдардың, ұлттық компаниялардың, операторлардың, IT-компаниялардың және сарапшылар қауымдастығының өкілдері – цифрлық бағыттардың жетекшілері, шешімдер архитекторлары, әзірлеушілер мен автоматтандыру, деректерді талдау, киберқауіпсіздік және жасанды интеллект салаларында жобаларды жүзеге асыратын мамандар енді. Олардың еңбегі өндірістік процестерді трансформациялауда, тиімділікті арттыруда және заманауи технологиялық шешімдерді енгізуде маңызды рөл атқарады.

Осы беделді тізімге компания қызметкері, бағдарламашы Сабит Айдаровтың енуі Kazpetrol Group үшін ерекше мақтаныш.

Кандидатураны ұсыну бастамасы Kazpetrol Group компаниясының HR департаментіне тиесілі екенін айта кеткеніміз дұрыс деп санаймыз. Департамент үдерісті барлық кезеңде сүйемелдеп, компанияда қызметкерлердің жетістіктері назардан тыс қалмай, лайықты бағаланатынын айқын көрсететін жүйелі тәсілді қамтамасыз етеді.

Маман туралы

Сабит Айдаров – бизнес-процестерді автоматтандыру, корпоративтік ақпараттық жүйелерді әзірлеу және енгізу саласындағы жоғары білікті маман. Қ.И. Сәтбаев атындағы Қазақ ұлттық техникалық университетін тәмамдаған.

Ол «Цифрлық кен орны» жобасының әзірлеушілерінің бірі және негізгі қатысушыларының қатарында. Бұл жоба өндірістік процестерді басқаруға арналған кешенді платформа болып табылады және корпоративтік әрі өндірістік жүйелерді біріктіруді, бизнес-процестерді автоматтандыруды және деректерді өңдеудің бірыңғай ортасын қалыптастыруды қамтиды.

Жоба аясында өндірістік көрсеткіштерді, жабдықтардың жай-күйін және қызметкерлердің тиімділігін нақты уақыт режимінде бақылауға мүмкіндік беретін заманауи BI-құралдары енгізілді.

Сонымен қатар, Сабит HR-платформа – «Корпоративтік университетті» әзірлеуге, HR-процестерді автоматтандыруға және хронометраж құралдарын енгізуге белсенді қатысты. Бұдан бөлек, заң, жоспарлау-экономикалық бөлімдер мен материалдық-техникалық қамтамасыз ету қызметі үшін бизнес-процестерді автоматтандыру шешімдерін іске асырып, олардың жұмыс тиімділігі мен ашықтығын арттыруға ықпал етті.

Kazpetrol Group өз қызметкерлерін мақтан тұтады. Олардың кәсібилігі, бастамашылдығы мен білімі компанияның және жалпы саланың дамуына елеулі үлес қосуда.

Сабит Айдаровты осы маңызды жетістігімен құттықтай отырып, алдағы уақытта жаңа табыстар, кәсіби биіктер және ауқымды жобалардың сәтті жүзеге асуын тілейміз!